وش ابي بالحياة لنحنى راسي .. ؟؟

ينجرح قلب لكن ترتفع هامة
والله إني لأموت ولا انحنى راسي

لو رماني زماني وسط دوامة
العواصف شديدة والجبل راسي

أنقل الحزن وأمشي منتصب قامه
قاسي الوقت لكني بعد قاسي

وأسمع الحلم يصرخ لحظة إعدامة
رابط الجأش ماهز الخبر بأسي

عزتي غالية والناس سوامة
قلت ما اطيع حتى تقطع انفاسي

زانت أيام عمري وشانت أيامه
مارجيت العز من رحمة الناسي

من عجز لا يدوس الهم بأقدامه
لازم انه مع الايام ينداسي

يندمل جرح قلب ماتت أحلامه
بس ما أظن يبرى جرح الاحساسي

يوم صارت مابين القلب والهامة
ويش ابي بالحياة لنحنى راسي

وسلامتكم